تمــــــــر حنــــة

تمــــــــر حنــــة   
                                                                           

من زمان وأنا دايما أحكي
لما ح أكبر حنسى كل الذكريات
الطفولة والشقاوة

 وعمر فات
حنسى حتى....
ولاد الحتــة
اللي حاموا كتير ورايا

في كل حتة
اللي ياما اتخانقوا عشاني بالساعات
واللي من صغري قالولي
عنيكي بتقول حكايات

وأنا مانكرش حاجة فيَّ
كنت شايفة نفسي شوية

وكنت أفرح لما أشوفهم
قاعدين يتخانقوا عشاني
كنت أحس ساعتها إني
مفيش مني في زماني

والغريبة إني لما كبرت
ماعرفش إيه نساني؟؟
كل شيء اتغيَّر فيَّ
كــأنِّي حـــــد تاني

وتمر سنة
وتجر سنة
ووراها عدى
كااااااام سنة

وفي عز ما كنت في الغربة
بلف وأدور...
شميت ريحة جميلة...غريبة
لأ...لأ...قريبـــــــــة
نفس الريحة كانت عند جارتنا
في أول دور
شجرة حنَّــــــــــــة

مش بس ريحتها الحلوة شميت
لكن طفولتنا
شقاوتنا
إزعاجنا الدايم للأحباب
إضرب يلا جرس الباب
وإهرب يا إيهاب
استحمل يا بني رش المية
أصل الجو حر شوية

كل اللي فات رجع
وافتكرت...
ماما بتقول بلاش دلع
قومي وروحي المدرسة
وإعزفي لي ضروري
السلام الجمهوري

دخلت أوضة الموسيقى
خدت الأوكورديون
وعيني على ماما واقفة في البلكون
شاورت لي من بعيد
وأنا رفعت الإيد
بلادي بلادي
لكي حبي وفؤادي

لقيت ذكرياتي بترجع سِــــــنَّّة....سِـــــــــنَّة
مع ريحة التمر حـــــنَّة
سوسن سحاب