ليته يعلم

 

لـيــــتهُ يـعـــــلـم

                                                                                      

لـيتـــه يعلم....
أن حضنـــهُ وطـنــي

لـيتـــه يعلم....
أن قلبه سـكــني

لـيتـــه يعلم....
أن في وجودهِ أمــني

وغـيـــابه...
من أســباب حـزنــي 
لـيتـــه يعلم....

وكـيــف سـيعلم؟؟ 
وبـيــننا بـُعـدُ المسـافـات والزمـــنِ
وسـدودٌ تـُحيــل بينــه وبينــي

لـيتـــه يعلم....
أنه تشـــتاق لصــوته أذنـي
وتشــتهي صــورته عيـني

لـيتـــه يعلم....
أنــي بـدونـــهِ..... نـصــــفٌ
نـصــفُ قـلـــبٍ
وهــو مــن يـكـملنـي...
نـصــف وجـــه بـلا مـلامــح
وهو...بريـشــتهِ يرســـمني
 
لـيتـــه يعلم....
أنـي وأنـي وأنـي وأنـي....
وأنـي وأنـي وأنـي وأنـي....
وأنـي وأنـي وأنـي وأنـي....
لـيتـــه يعلم....

سوسن سحاب
25 فبراير 2015

وتبقى أنت

وتبـــقى أنــت....
                               

وتبقى أنـــت لي أمني...
ومدينتي وحصني
وميــــنائي
حين تعصف 
الرياح بسفني

ومازلت تسألني
هل أحبك؟؟
 وكيف لا ؟؟
ولولا حبك
لغاب الفرح عني
كيف لا ؟؟
وفي بعادك...
أحزاني هي سجني 
ودموعي لا تتركني ؟؟

سوسن سحاب
2/2/2015
 

جاني النبي في المنام

رؤية لأقرب المقربين مني....فقد رأى النبي صلى الله عليه وسلم ليلة مقتل الجنود في العريش ورأى وجهه الشريف حزينا.....

جـاني النـبي في المنــــام
                                                  

جاني النبي
عليه الصلاة والسلام
في المنام
وكان حزين
واقف يصلي بالناس امام
قربت منه.....
مسكت فيه
سألت نفسي
ده حقيقة ولا منام
لقيت النبي عليه السلام
وشه حزين

فكرت يكون ايه السبب؟؟
اللي رسم على وجهه الكريم
حزن وغضب
فيلم سفيه ؟؟ رسم حقير ؟؟
أو كلمتين إساءة أدب ؟؟
فكرت كتير
لحد ما صابني التعب

بس فكرت امتى شفت النبي
عليه الصلاة والسلام
وهو حزين
وجاني في المنام
كان يوم ما ايد الغدر
من ناس مأجورين
ضربت عيالنا المسالمين

ضربوهم وقالوا الله أكبر
كان نفسي توجه سلاحك
يا خسيس يا متكبر
للي راكب فوق بلادك
للصهيوني المستعمر
وساعتها كان يحق لك
بعلو الصوت
تهتف ......الله أكبر

اللي خلى النبي عليه السلام
وشه حزين
مش رسم سيء ولا كلمتين
وربه قاله:
"إنا كفيناك المستهزئين"

لكن اللي يخلي رسولنا
بصدق حزين
المسلمين...
بيقتلوا في المسلمين
ليه يضعفوا نفسهم بنفسهم
ويسألوا..ليه بقينا كده؟؟
في الأرض مستضعفين؟؟

اللي خلى النبي عليه السلام
وشه حزين في المنام
هو حال المسلمين
بعد ما كانوا خير أمة
اتحكموا فيهم اللئام
أمروهم بكل غدر وطيش
يدبحوا ناسهم
وقالولهم حاربوا الجيش
واقطعوا راسهم
خدعوكم باسم الدين
وهما دين مفيش
وحب المال هو أساسهم
يا قاتل بتقتل مين ؟؟
ناس بتموت عشان
إحنا نعيش !!!!

لو كنتوا قريتوا في كتاب
رب الأنام
لو فهمتوا سنته
عليه الصلاة والسلام
لكنتوا عرفتوا
ياملعونين
يا مطرودين من جنته
يا أخس اللئام
إن دم المسلم ع المسلم حرام
دم المسلم ع المسلم حرام

دم المسلم ع المسلم حرام

1 فبراير 2015

نفسي أعرف

نفسي أعرف
                                          

نفسي أعرف إيه شعورك
وانت بتموت نفسك عشاني
نفسي أعرف....
إنت مش خايف؟
مش هايب؟
مش أناني؟ 
بـتجري ع الموت وعارف
ممكن ما ترجعش تاني
ما فكرتش يوم في أمك
أو عيالك 
أو حبيبتك 
لو ثواني؟؟
كل تفكيرك في بلدك
وإزاي ما تخليهاش تعاني
لو عميل 
ولا خاين
أو حقير

رمى القنابل 
 دمر وحطم 
وقتل كتير
لا عنده نخوة
ولا راعى اخوة
ولا حرمة دم...
وحرمة الموتى
مالهاش عنده أي تقدير
 ******
بس سيبك
اليوم ده عيدك
مش عيد اللي خانك
وسرق سلاحك
ودمر وحرق بكل ضمير

****
وكل سنة واللي عايش منكم
عايش في صحة ومليون خير
وكل سنة والشهيد منكم
عايش يُرزق عند رب قدير

سوسن سحاب
25 يناير 2015

صديق الغربة

صـــديق الغـــربـة                                              

في الغربة بتفرق كتير
لما تلقى حد جنبك..
حد لونه مصري زيك
حد جرحه شكل جرحك
حد يشبه نفس ملامحك
حد لو تزعل يصالحك
 حد لو تغلط يسامحك 
حد يتألم عشانك
حد يبكي معاك في فرحك
حد يكون لك أهل وعزوة
ووقت الشدة يكون في ضهرك
حد مكوي بنار الغربة
ولما تسمع له يرتاحلك
حد لما تكون مهموم
تلاقي قلبه وبيته مفتوحلك
حد زي صديق الجيش
اللي عمره ما يتنسيش
أخ مش من أبوك وأمك
ولا ابن خالك ولا ابن عمك
لكن يحبك ويشيل همك
ولو في يوم شافك حزين 
ما يسيبكش إلا ما تضحك
هو ده الأخ الحقيقي
صديق الغربة .....
أخوك وصاحبك


سوسن سحاب
20- 1- 2015