على اســم مصـــر 7
حـفــر القـنـــاة
على اسم مصر..
كتــب التاريخ...
سطور من نور
مصر اللي قالوا حتغرق
عبرت للأزمة بحور
وعليت فوق الصغائر
وبنت جسور وجسور
******
على اسم مصر
كـَتب التاريخ موال....وغنيناه
جدودي حفروا القناة
وأبويا عبر القناة
وابني وأصحابه
حفروا تاني قناة
*******
على اسم مصر
كتب التاريخ على بابها
الماضي ما حننساه
بعد ما جدودنا حفروها
بالسـُخرة..بالمعاناة
ماتوا من العطش
وموتهم كان مأساه
ومن يومها وقناتنا
مطمع لكل غـُزاة
****
وأبويا ورفاقه
وكل اللي دخل الجيش
حلف باسم الله
ليحرر أراضيها
أو يروح ما يجيش
منهم راح شهيد
ومات على ترابها
ومنهم اللي رجع
يحكيلنا أمجادها
ومنهم كان فقيد
وما رجعش يا ولداه
*******
على اسم مصر
نقول من غير مباهاة
مصر مش بس ماضي
ده حاضر وعملناه
حفرنا تاني قناة...
لا قلنا دليسبساه
ولا قلنا وامعوناااااااه !!!!
بفلوسنا وايدينا
نكمل ما بديناه
******
وترابك يابلدي
بدمانا احنا رويناه
ولما حفرنا القناه
ما لقينا بير بترول
ولا اكتشفنا الدهب
ولا كنوز وجواهــر
جت من غير تعب
بس اللي أغلى من
أي نفط ودهب
لقينا لجنودنا رفات
اللي غاب وما رجعشي
اللي لا عاش ولا ماتشي
الشهيد اللي نسيناه
رجعت سيرته للحياة
أصـل الأرض ما نسيتشي
الأرض بتحب عيالها
وبترجع اللي تــاه
سوسن سحاب
11 سبتمبر 2014
ليست هناك تعليقات:
إرسال تعليق