وطن مغشوش

وطـــن مغشــوش
***********
                                                       

               
عايزة أكتب كلام كبير.....
أنا لو قريته ...
ما أفهموش....
أصل الوضوح....
عيب كبير....
وموضة قديمة...
ونويت إني ما ألبسهوش....
********

موازين مقلوبة....
ثوار سبوبة....
على كل الموائد...
بياكلوا جامد...
وما يرحموش....
*********

شوف الندالة .....
شوفي العمالة....
عيال سيس ....
حبة جواسيس...
سرقوا الثورة....
وهبروا الهبرة....
وجابولنا بداله وطن مغشوش....
*********

وطن مش لينا....
ولا لأهالينا....
ما يشبهناشش...
وما نعرفهوش...
**********

خونة وباعونا...
ويبيعوا أبونــا واللي جـابـونا...
وفي أكبر حيطة لبسونا...
وطلع أملنا على فاشوش....
*********

عيال صايعة ....
واكلنها والعة....
وعاملين فيها...
آل ولاد جامعة..
ياخي حوش حوش....
**********

والمثل قال : يابا شرفني...
قاله : 
لما يموت اللي يعرفني...
وإنتوا كلكوا ما تشرفوش....
***********

تاريخكم كله متسجل....
بنت بنت وسنجل سنجل...
والشريف طبعا ملهوش...
**********
حبة خونة يخوِّنوا بعض...
عندي ملف يجيبك الأرض..
بتخوفونا بماما أمريكا..
هات لي ملفي معاك يا سوكا...
وانتوا تخافوا ما تختشوش...
**********

يا مصر يا أمـَّه يا حتة سكر...
عشاقك كتير كتير....
لكن حسادك أكتر....
يبيعوكي ويملوا الكروش...
**********

وربنا حارسك طول عمرك....
وفي كتابه العزيز ذكرك...
وفي يوم حتبيَّض وجوه....
وتـِسوَّد للخونة وشوش...
************

سوسن سحاب
8/ 1/ 2014