الوطن

الــوطـــــــــــــن....
                                                                                                 

الوطن...
مش حفنة عفنـــة من تراب
زي ما قال ابن العبيطة
ولا شوية نقـط وخطوط
مرســومة على الخريطة

الوطن
هو المصانع
والمزارع والشوارع
وبنت زي القمر
صوت ضحكتها طالع..
لما تضحك لصاحبتها
ضحكتها توقف الشارع

الوطن 
لما تقول الآه...
تلقى حد سامع

الوطن 
هو جيرانك اللي يشوفوك 
يهلـــوا عليك ويجروا
هو صحابك اللي اتعودت
تروح معاهم سينما مترو

الوطن
هو فسحة بسيطة ع الكورنيش
هو دفعتك اللي عشت معاهم
أحلى أيام في الجيــــش

الوطن 
بنت الجيران اللي واقفة في الشباك
وانت موارب شباكك
وعينك ضاربة هناك

الوطن 
هو ايام ثانوي والجامعة
ذكرى جميلة
على شوية مقالب والعة
وجد ولعب وحب في حب
وعيون من الضحك دامعة

الوطن 
هو الشوارع والحارات 
اللي محفور على كل شبر فيها
حواديت وحكايات

الوطن
بنوتة حلوة
مكسوفة وحاضنة الكتاب
وحبة أولاد بيلعبوا
الكورة الشراب

الوطن 
هو البيوت
والحيطان
وشجرة توت
يطلعها عشانِك ابن الجيران

والوطن
بنت الجيران الحلوة القمر
اللي ساكنة في تالت دور
وبتلوِح النظر
ومعجبينها طابور
الكل يمنـِّي النفس
وهي مش شايفة حد
شايفة روحها وبس

الوطن
هو ابويا وأمي
هو خالتي وعمي
وكل حد يحبني
يخــاف عليَّ 
ويشيل همِّــي

الوطن
هو فلوكة ومراكبي 
ومشي ع الكورنيش وحبة ترمس 
وبنت وولد 
ايدين تترعش وعيون بتهمس

الوطن
هو النيل والهرم
وأحسن جدعنة 
وفوقيهم شوية كرم

الوطن
غديوة تعملها مع حبايبك
وتروح تنام
تضرب كشري
فول وطعمية
وحمص شـــام 

الوطن
وانت عنه بعيد
بتشوفه شكل تاني
بتشوفه أحلى وأجمل
وأنقى من كل المعاني

الوطــن
وإنت بره غير وإنت جوه
وانت في الغربة
شايفه كل حاجة حلوة
بترجع ذكرياتك 
كل ما تسمع غنوة

 الوطن
مهما كنت في دنيا تانية
ولو بعدت طول العمر
أراهنك حتى لو قلبك حجر
مش حتمسك دمعتك
لو سمعت شادية
بتقول يا حبيبتي يا مصر

الوطن 
كل دول مع بعضهم 
أو كل حاجة لوحدها
بس في كل حاجة
حتلقي سر فريد
مش موجود غير عندها
واللي يحبها
ويعشق أرضها
ياخدها زي ما هي على بعضها
ويحبها
ويحبها



سوسن سحاب
25/ 11/ 2013