تترات البداية

تِـتـْــــرات الـبــدايــة
مـــرِّت ســـنة

                                                                                               

مرت سنة
وكمان سنة
وزيد عليهم كام سنة
قول ييجي خمستاشر سنة

*******
وانت وأنا
كأننا...
لسه في أول الطريق
بنكتب تترات البداية
لسه بنسأل نبتدي...
نبتدي إزاي الحكاية 

********
نفس رعشة الشفايف
لما تنطق
نفس القلب اللي انت شايف
عشانك دق
نفس العقل اللي انت عارف
ليك صدَّق
نفس المشاعر
اللي من أول ما شفتك
ولسه عايشة جوايا 

******* 
كـل حاجة فيك تتدرس
العيون إزاي بتهمس
الكلام اللي بيهوس
الإيدين لما بتلمس
يدوب التلج ويايا

*******
كل سنة 
 وانت حبيبي أنــا
كل سنة 
وابعد يا حسود عننا
 وياااااا رب ياااا ربنا
ما تحرمنا من بعضنا
وإنشالله ما تكتب لنا
نشوف تترات النهاية

******

  سوسن سحاب
27 ديسمبر 2014

كلام القلب

 كـــــلام القـلـــب
                                                                        

كل اللي ما قالهوش لساني
قالته بشويش عيوني
وكل اللي قلته بعيوني
قلبي هو اللي ملهولي
*****
 قلبي قالي عليك كلام...
لو عرفته حتنسى النوم
بس يا قلبي بلاش ملام
لا حزن ولا فرح بيدوم
ولو كان قاسى زيي الغرام
لجالي امبارح قبل اليوم

******
 قلبي قالي أكتر وأكتر
وهو لا شايف ولا بيـقـدر
قلبه لابس نضارة سودا
وعقله في غيري بيفكر
*******
قلبي أخد قرار أخير
يبعتله وبدون تفكير
والعيون كانت مراسيل
اول ما راحوله  رجعولي
 برسالة حب وقالولي
انتي وبس حبــه الكبيــر
حبـــه الأول والأخيـــر

سوسن سحاب
10 ديسمبر 2014