الروضة الشريفة

الروضة الشريفة

                                                                                                   

وأنا في الروضة الشريفة
بسجد لله وبركع
ولما بفكر إني 
سجدت مكان الحبيب
بلاقي القلب يخشع
وعيون القلب تدمع
وتخشع الأصوات
وبس الهمس تسمع

أدعوك يا الله
في روضة من الجنة
تردني ردا جميلا
ونبينا لينا يتشفع

أوهام عمرنا

أوهــــام عـمـــرنا
                                                        

سنين كتير من عمرنا
ضاعت هــدر....
وإحنا بخيبتنا
بنعلق فشلنا
على شماعة القدر
******
طب يعني إيه المشكلة
لما آجي أحــب....أحب
وردة على الشجر
ريحتها حلوة
ولونها بيسر النظر

******
ولا لازماً وحتماً
إن عشقت.....
أعشق قمـــر؟؟؟
بعيد وعالي
ومهره غالي
وأفضل أسهرله الليالي
وهو لا حس ولا خبر !!!

*******
وأنا السهران 
أكلم نفسي 
أناجي الليل
ألوم قلبي
اللي  شفت بسببه الويل
وطول السهر
******
 قلبي قاللي ما تلومنيش
الهوى مش اختيار
الهوى قضاء وقدر

سوسن سحاب
30 أغسطس 2014

دولاب الذكريات

دولاب الـذكريـــات

بفتح دوﻻب الذكريات
نطت من جواه حاجات
لعب قديمة
ورق كوتشينة
كتب...قصص
ومذكرات.......
صور كتيرة
 

شرايط كتير
قبل زمن السيديهات
أم كلثوم والآهات
ومحرم فؤاد
يا واحشني رد عليا
 إزيك سلامات 
وفايزة خلينا ننسى
ننسى اللي فات
وعبد الحليم وذكريات

وشوية كتب
بين السطور
مكتوب حكايات 
وفي الصفحات
ورد دبلان وجوابات
في كل كتاب وردة مطوية
وفي كل جواب حكاية منسية

وشريط فيديو غزل البنات
والسقا مات
 وماجدة وفيلم المراهقات

وعروستي القديمة
كانت في حضني بتبات
مسحت التراب فوق الحاجات
ونفضت عن عقلي
تراب الذكريات
ولقيتني بنت صغيرة
رجع بيها الزمن ورا
عدة لحظات

رجعت لأيام المدرسة
حاضنة الكتب 
ماشية بثبات

أسمع كلام على النواصي
يلعب بمشاعر البنات
ومحاولات ومحاولات
وردي الوحيد كان ...السكات

 كل شوية نفتح دولاب الذكريات 
ونعيش يومين في زمن فات
كل ذكرى 
وكل فكرة 
وكل امبارح أصبح بكرة
كل ده وكتير حاجات
رجعت لما فتحت.....
دولاب الذكريات 



28 / 8 / 2014
 سوسن سحاب